Vachal tar Phulal By DR. Hanumant Bawari

आजच्या डिजिटल आणि आभासी जगात आपण तंत्रज्ञानाच्या आहारी गेलो आहोत. 'वाचाल तर वाचाल' ही जुनी ओळख पुसून 'वाचाल तर फुलाल' असा नवा मंत्र देणारे *डॉ. हनुमंत भवारी* यांचे हे पुस्तक खऱ्या अर्थाने वाचन संस्कृतीचा दीपस्तंभ आहे. आपण अनेकदा 'वेळ नाही' किंवा 'मोबाईलमुळे वाचन होत नाही' अशी कुचकामी कारणे देऊन समृद्ध साहित्यापासून दूर पळतो; परंतु हे वास्तव नसून केवळ स्वतःच्या अनास्थेवर पांघरूण घालण्याचा प्रयत्न आहे. पुस्तकाशी तुटलेली नाळ पुन्हा जोडण्यासाठी हे पुस्तक अत्यंत प्रभावी मार्ग सुचवते. 'काय, का आणि कसे वाचावे?' या त्रिसूत्रीचा उलगडा करताना वाचनाला केवळ सवय न ठेवता, त्याचा 'आनंद सोहळा' कसा करावा, याचे दर्शन लेखकाने या पुस्तकात घडवले आहे. ज्याप्रमाणे एखादे फूल उमलल्यावर स्वतः सुगंधित होतेच, पण सोबतीचा परिसरही प्रफुल्लित करते; त्याचप्रमाणे एक सुजाण वाचक स्वतः प्रगल्भ होतो आणि समाजाच्या वैचारिक कक्षाही रुंदावतो. लेखकाने एक मार्मिक उदाहरण दिले आहे. 'धारदार कुऱ्हाडच अधिक प्रभावीपणे लाकडे तोडू शकते; अगदी त्याचप्रमाणे सकस वाचनामुळे विवेकशील झालेला मेंदूच जीवनातील यशाची शिखरे पादाक्रांत करू शकतो. कोलमडलेल्या वाचन चळवळीला पुन्हा ऊर्जितावस्था देण्याची ताकद या पुस्तकात आहे. वाचकांच्या मनाला भावनिक साद घालणारे आणि वैचारिक अधिष्ठान असणारे हे पुस्तक केवळ वाचनीय नाही, तर प्रत्येकाने मनात साठवून ठेवावे असे आहे.